考試

呢排考試,其實一向都無咩理佢點温,不過每日都見到佢好似平時放假咁睇電話,或者一邊Youtube一邊温書,都有小小擔心嘅。不過其實都中學生,由得佢算。

睇下考成點先再諗。

IMG_1257.JPG

 

 

2019北海道 Day 6-7

終於到最後兩日,一口氣寫埋佢 XD

Day 6

今朝本來諗住去三角市場食蟹嘅,但因為唔想行咁遠決定去附近食海鮮飯先。揀呢間係因為網上好多comment都勁讚,又近我地酒店。店鋪位於遊客區中心,三個人要叫三個飯,埋單9300yen。其實我又唔覺得特別新鮮好食,D刺身咪又係喺雪櫃拎出嚟,最大賣點應該係果幾舊大蟹腳,係好食嘅。

食飽就慢慢周圍行睇玻璃,D野好靚但真係無用到一個點,所以都係齋睇多。不過都係忍唔住手買咗條鍊,米B就買咗粒150yen嘅玻璃粒,真係慳妹嚟嘅。中間入咗去北菓樓休息,買咗件餅食,都幾好味。

因為天氣凍,行兩野又要走入鋪避寒,結果行到街尾就差唔多天黑,快腳去整埋個音樂盒先。今年嘅主題係聖誕節。

個音樂盒要等半個鐘D膠水乾咗先可以拎,我地就去咗對面一間勁多遊客嘅鋪頭行,裏面原來好大又有幾層,行下影下得意野又夠鐘,可以去食個early dinner。行過一間好多人嘅綠茶雪糕店,個人好凍但又好想食雪糕咁點算呢?答案就喺間鋪入面:坐喺暖爐前面食咪得囉 XD

今日終於食到魚真,完全係六日以嚟食得最開心嘅一餐,抵食又好味,正正正!飲飽食醉後去便利店買埋個甜品就返酒店,個布丁出乎意料咁好味!

Day7

今朝其實無咩行程,因為要坐11點班JR出機場。原本打算去三角市場食蟹,但有人話已經食到刺身疲勞,所以決定行去食個魚餅就算。途中經過條鴨橋,以前我地同米B喺度餵過鴨,但而家D鴨都唔見哂啦。

食完返酒店順利check out,趕到11點班JR去機場買手信兼食lunch。今年個counter去咗無雷公咁遠,行出行入都要十分鐘,結果又係趕趕趕,米B用10分鐘極速食完個咖喱飯就仆到咁出境,唉點解成日都要趕真係唔明,明明已經預留咗好多時間架嘛。不過而家出境真係好快,全部counter都好似e道咁,好似大約用咗5分鐘就攪掂。

都係香港航空返啦,上機後有驚喜,發現部份機位嘅娛樂系統係work嘅,雖然都係得D舊戲不過好過無啦 XD。飛機餐都算幾好味,我覺得好食過國泰囉。

終於返到香港,結束7日嘅行程。一如以往啦,今次旅行都算順利,係米B成日青少年面真係好難頂,下次考慮要佢留家看貓,我同米爸兩條友去就算。

Day 1<<<

2019北海道Day 5

今日係留喺二世古嘅最後一日,朝早食完早餐兼Check out就打算喺呢邊玩下就算,但一去Family Lift就後悔,又係旺角咁款重多人過前日,唉。

IMG_1033

上到去滑咗一陣米爸就話不如滑過隔離個山,但米B又唔係好想去,於是又沿路落番去,玩兩野又夠鐘食飯,是旦去咗入口隔離間酒店餐廳食,估唔到又幾好味,不過lunch時間就係人山人海。食完飯又坐纜車上咗山頂,勁大風又凍,行行企企攪咗好耐先發現根本無路比初學者落山,結果我同米B唯有坐番纜車落山。落到山都三點,又差唔多夠鐘要走,好似浪費咗大半日咁,下次真係要認真D研究下路線先得,完全係浪費時間同金錢。

還裝備前影下相先,呢間鋪租野真係唔錯嘅,抵佢咁好生意,下次希望有機會可以繼續幫襯。鋪入面基本上係用英文溝通嘅,你講日文佢地應該都好頭痕下 XD。

還完野就係時候走人,等巴士去俱知安站再轉車去小樽,不過勁多人等車,架巴士又迫到乜咁差D上唔到車,好心開多幾個班次啦老友!巴士站前有幾架美食車,有人又忍唔住買咗個漢堡包。

IMG_1065
風雪中等待漢堡

企咗大約20分鐘就到俱知安站,再轉一個半鐘JR到小樽。小樽同札幌一樣都係無咩雪,今次卜咗間新酒店(但個名好難記,運河前附近啦下),內籠設計好靚,特別欣賞佢個酒筒櫃。

Hea完諗住出去魚真食飯,發現原來已經八點半,魚真九點關門。在沒有選擇之下唯有去番上次果間揾笨實魚萬,重要勁唔好彩坐喺三個煙鏟隔離,唉。最好食係個帶子剌身,非常新鮮彈牙,其他食物只是一般而已。

good

食完就番酒店休息,因為成身都係臭煙味走咗落去大浴場到浸,可惜唔係温泉不過好過無。明日又係無咩行程,可以唔駛咁早起身。

Day 4<<<   >>>Day 6-7

2019北海道Day 4

過夜後精神稍為恢復,捉米B落去食早餐,當然唔夠之前果間咁好味,但都算可以食飽嘅,面包都幾好味。

因為買咗全山券,所以今日決定坐巴士去第二個滑雪場試下,聽講隔離個Hanazono好適合初學者,於是就坐免費Shuttle Bus過去,好幸運喺最後一刻上到車。坐咗大約20分鐘就到咗一個好廣闊嘅滑雪場,D粉雪勁厚。不過個初學者電梯似乎無咩人用,我地同米B一齊行過去就明白原因:因為實在太短又太平,滑落黎完全無意思,行過去又浪費氣力。結果米B就坐喺平地上面玩雪,米爸就單拖上山睇下咩環境先。

米爸落嚟之後就話唔多適合初學者上去,結果我地又要轉場去Annupuri果邊。坐咗差唔多一粒鐘巴士先過到去。不過果邊好玩好多,又平又闊的雪道很適合初學者,落纜車由當初的傻瓜三人組(次次都三碌拎)終於變番正常初學者,只有我偶爾會碌地,但也未至於當初那個狼狽模樣了。

IMG_1005
睇下呢邊幾闊

山上嘅時間真係過得特別快,好似上咗去兩次又天黑,又要坐成粒鐘巴士返去Hirafu果邊。下次如果再黎應該住Annupuri或者Niseko Village呢邊。

IMG_1012

夜晚Book咗間餐廳食和牛,雖然唔平但都幾好味,叫做補番尋日個聖誕大餐。

食完米爸去Night Ski,我同米B就返酒店,浸下大浴場,睇下電視咁。聽日最後一日滑雪啦。

 

Day 3<<<   >>>Day 5

2019北海道Day 1

今次北海道之旅以驚嚇嘅方式開始。

由於是八點機所以要五點起身,但係三點先訓,結果只係訓咗兩個多小時。五時十五分,米b都順利起床了,昨日執了一天多的行李有兩大箱,希望沒漏帶重要東西。出機場book了黃的,服務幾好之餘重有野送,第一次坐的士坐得咁舒服開心。

去到機場check in後如常老麥食早餐。施施然食完先發覺早已過了登機時間二十分鐘,距離起飛只有半小時!頓時倒抽一口涼氣然後拔足狂奔,過境花了10分鐘,入到去見水牌已顯示final call!那個登機口偏偏又無雷公咁遠,重要去到最督果個位。我狂奔至一半路程已氣力不繼,而米b則越戰越勇,一馬當先衝到前面,我離遠看到地勤人員都還在就鬆了一口氣,趕到登機櫃位後發現我們並不是最遲的,還有3個在我們後面 XD,一定係早機嘅關係,大家都矇下矇下嘅。

影果陣重未知出事,個樣幾咁悠閒

今次我哋坐香港航空,之前都有擔心佢會執笠去唔到,仲特登買定旅遊保險,好在最後又冇事。不過飛機上面嘅娛樂系統就冇咗,所以我哋都預先帶咗iPad同書上去睇,米B竟然帶埋功課上去做,真係港孩唔易做。

捱左四個鐘頭,終於都到札幌。見肚餓去便利店買咗兩串雞咬下,又幾juicy但係衰在凍咗。跟住例牌逛下初音館,買下folder然後坐JR入札幌。家陣有電子Suica卡真係好方便,用電話Do下就入閘唔駛去買飛,可惜無兒童版。

出到札幌已經天黑,雖然係零下幾度,但真係唔算好凍,不過周圍都無咩雪。由於米b期待食湯咖哩已久,特登上網揾咗間札幌頭三位嘅湯咖哩諗住試下,點知推住行李好辛苦咁搵到間鋪先發現佢冇開,勁失望,結果唯有去返我哋去過好多次嗰間,不過都係好食嘅。

IMG_0788.JPG

食完就坐地鐵返酒店,今次揀咗中島公園附近嘅JAL City酒店,價錢合理而且又大又新淨,唔錯唔錯,不過唔記得問下D咖啡究竟要唔要錢,無飲到真係浪費咗。

放低行李之後就坐地鐵過返去大通公園睇聖誕市集。因為只係23號,個市集都唔算好多遊人,賣D無咩用但好靚嘅聖誕裝飾,算係感受下日本嘅聖誕氣氛。

這個slideshow需要JavaScript。

行完又肚餓可以去食燒肉啦~今次去咗食和牛出名嘅味覺園,叫咗個和牛拼盤,係幾好食嘅,不過同我地以前食嘅和牛好似有啲分別,無咗果種入口即融嘅感動,牛舌就幾好味。食完我哋就行路返酒店休息。因為尋晚訓得太少,個人攰到乜咁所以都係早D訓。

>>>Day 2

 

2019北海道Day 3

朝早起身順利check out,然後過隔離酒店上巴士去滑雪場。呢架Whiteliner巴士真係好方便,事前要網上預約兼比錢,到時就有工作人員去集合地點揾你,真係好安心又放心。坐咗大約兩個鐘頭就到啦。沿途見到積雪好厚,又落大雪,同札幌係兩個世界,果然二世古真係名不虛傳。

今次住Hirafu,我都係第一次去。酒店喺大斜路中間,都算係滑雪場附近嘅。去到酒店放低行李就換衫去租滑雪用品。根據網上推薦去咗對面街嘅Rhythm。入到去果然覺得D員工好friendly,好快就同米b租好snowboard同鞋,全部係滑雪名牌Burton嘅(米B塊板係Soloman嘅),然後覺得自己忽然間勁咗,充滿信心咁向住附近嘅Ace Family Lift出發。

去到Family lift真係嚇一跳,人山人海又窄好似旺角銀行中心出口咁樣。米爸先拎野返酒店,我同米b就完全唔記得要做咩,頭先D氣勢一下子無哂,唯有揾個位坐喺度等米爸返黎再講。等咗幾個世紀米爸先黎到,見到咁嘅狀態都唔係辦法,就決定坐纜車上咗去先講。

上去其實都唔係問題,最大挑戰係日本規定Snowboard要上咗一隻腳先可以坐纜車,唔似韓國可以攬住塊板上咗山先慢慢著。換言之我地要用單腳扇落纜車,結果不負眾望三條友一齊三碌拎跌倒地上。不過無事嘅,跌低咪起番身囉。上到去碌落山其實算係容易嘅,不過第二次上去同樣一齊PK,米B重要手踠著地受傷,幸好應該只是扭到並沒有骨折,她也很堅強的繼續滑。其實我唔明點解要喺初級雪道落車位整幅牆喺度比人撞呢?Anyway,山上嘅時間過得特別快,轉眼到四點,日場夠鐘收車,我們三人都體力不支宣佈放棄Night Ski。

IMG_0945
其實對住個羊碲山滑雪真係好爽

因為晚餐訂咗八點半,所以放低裝備後決定先去食Pizza同意粉當下午茶,味道OK啦但個意粉唔夠熱。食食下先醒起點解三條友咁攰應該係因為我地唔記得食lunch早餐又食得少囉。

食完天黑番酒店,因為又凍又攰決定連晚餐都唔去食,Cancel咗booking後就過對面便利店買咗兩個杯麵同一公升蔬果汁,呢個就係我地嘅聖誕大餐啦,BTW個醬油拉麵幾好味,米B都食咗唔少。

Day 2<<<   >>>Day 4

 

2019北海道Day 2

札幌嘅第二日,今日本來打算去鈴蘭公園玩,但因為唔夠雪,公園有好多玩雪嘅設施都冇開,於是決定放棄唔去,周圍行吓就算(下面係中島公園,D雪薄到1cm都唔知有無)。

酒店嘅自助早餐真係幾好,竟然有刺身同埋Kagome蔬果汁任飲,勁開心。講開又講,喺咁乾燥嘅天氣之下,蔬果汁及維他命C真係好緊要,我勁飲咗兩大杯好滿足。另外個南瓜湯都OK嘅,茶泡飯則屬個人喜好。

IMG_0846

食完早餐就出發shopping。今日米爸要買滑雪衫、snowboard 同對鞋,因為實在太多野要買,竟然揀咗幾個鐘頭,買完真係天都黑埋,米b就喺間鋪入面睇電話,因為等得太耐所以嬲到唔出聲。

結果米爸滿載而歸,而我地為咗謝罪就同米B再去食多餐湯咖喱。多得Google又比我喺地鐵站附近揾到間好似都出名嘅湯咖喱。順利揾到路上去,食落又真係幾好味,重好多本地人幫襯添。米B話好食過之前果間。

食完個早晚餐米B都已經嬲完,我哋就喺狸小路行咗一陣,去Animate行下,又去大戶屋食咗朝思暮想嘅綠茶甜品同豆腐沙律,跟住就好滿足咁返酒店休息。聽朝一早就要起身搭巴士去二世古滑雪LU。

Day 1<<<    >>>Day 3