中二選科

估唔到話咁快就到咗要選科嘅時候,記得我果陣係中三乜科都要讀,中四就選文科或理科。而家就唔係咁玩法,中三就要揀幾個科讀,好處係唔駛浪費時間讀啲自己唔想讀嘅嘢,壞處係,大佬,佢地想讀乜其實都無咩概念,結果咪就係亂咁揀。

學校都有介紹下選科對將來揀大學學科嘅影響,唔會好似我咁on99揀咗文科然後就後悔。至於米B想揀咩科我當然無咩意見,最多係講下咩科容易讀,例如最容易梗係Econ XD。因為討厭歷史同中文差,對文學又零興趣,所以佢都係以理科為主;結果佢好實際咁揀咗Chem同Bio(考慮大學選科),另外就係IT(受佢老豆影響)同Psychology/Econ(好明顯係我嘅影響),真係大個女完全唔駛我地擔心。

雖然學校受到疫情影響大部份時間用zoom上堂,不過暫時睇唔到對學術上有咩影響(係中文科連木籣辭都無時間教,不過算啦),社交就如佢阿媽一樣咁差,我都無話可說,佢老豆就成日blame我話我影響佢,真係六月飛霜,明明佢自己咪一樣自閉無朋友。話時話,中一同中二嘅學習生涯就比呢個疫情破壞咗,希望下個學年會正常番啦,唉。

中二家長日

上星期六家長日,疫情關係都係用zoom,其實我覺得OK的。成績方面都係中遊啦,英文算好(聽講某科全班得佢一個僅僅合格)但中文很差,視藝也差因為不交功課。老師話佢可以擅用其英文優勢,幫下英文較差的同學。我話老師呀其實佢連同學都見唔到咁點幫呢?其實用zoom上堂真係好大挑戰,跟本好難集中精神,老師都話成績普遍全線下滑,都無咩辦法,都係重覆果三幅屁啦,留心上堂啦,交功課啦,之類。重有文言文真係連我都要投降,次次都係Google先識咋,不過我都同佢講盡力啦,修辭手法我覺得唔重要,但閱讀理解真係要識,唔好做Facebook上面閱讀理解0分果班盲毛。

另外視藝我質問佢做咩唔交功課,佢話好麻煩,特別係art critics。唉又係啲我唔識嘅嘢,算數啦唯有。基本上學術上嘅嘢佢都唔駛我擔心啦,真係老懷安慰,日後公開試大學之類點點點,就留番日後再煩啦。

2020回顧

今年真係無嘢好講,幾乎成年都留喺屋企,連學都唔駛返,成個暑假都無游過水,簡直係停頓嘅一年。

這照片簡直是2020年的寫照

唯一可以記下就係1月底同朋友去咗明古屋旅行,玩雪同順手買咗好多口罩,好懷念可以唔戴口罩出街嘅日子。

疫情期間偶爾都有出去四圍行下逛下街咁,都去過唔少地方。

另外就係買咗部Switch,玩咗幾個月熱情就退卻,諗起以前後生果陣瘋狂打機真係要嘆一句俱往矣。

不過其實無聊是福,世界這麼糟,我們還是如常過日子,是不是應該感恩。希望明年大家都能繼續日常生活,順順利利。

Santa!

聖誕前夕,偷聽到佢喺房度同同學傾計。

“No one believes in Santa. I don’t. It’s too fairy tale. Not my style. “

哦係咩?邊個尋日叫我掛隻聖誕襪出嚟架?

12月25日朝早,一轉身就喺床邊見到佢好興奮咁樣。

“Mom I found something in the sock! When did you sleep last night? “

“兩點左右啦。What’s inside the sock?"

“I don’t know, I haven’t take it out. How did he get in our house? “

“我點知啫。You may ask him if you saw him."

“Would Santa be arrested of burglary or intrusion if someone saw him?"

“無人報警拉聖誕老人嘅。"

聖誕老人的禮物係角落生物恐龍仔squishy.

之後重聽到佢同同學講 “What did Santa give you?"

HoHoHoHoHo…

真希望聖誕老人可以嚟多幾年。

尖沙咀半日遊

今個星期去到尖沙咀。因事要到星光行那邊,順道去一去誠品扮下文青,打下書釘,口渴就買杯天仁茗茶,逛下精品,個人都文學起上嚟。結果米B喺誠品睇咗兩本書,而偽文青最後買了一本《今周刊:進場美股其實一點都不難》哈哈哈哈哈。

之後沿著天星碼頭行去K11 Musea。剛好日後時份梗係要捉住米B影相,今天的日落還算可以。

第一次走進K11 Musea,令人難忘的是……那陣除真係好難頂,咩事要整到成件事咁庸俗?入到商場,設計是有但我覺得太busy,令眼睛和精神都很疲倦。那些天花的圈圈只令我想到會積很多塵,清潔應該很困難。我們很快的走了一圈,再上七樓看了幾件藝術品就走了。商場真的沒甚麼好逛。

逛完商場例牌去揾食,今次去造訪著名的重慶大廈食印度咖喱。本來想去七樓那間個個都推介的咖喱王,但因為沒有折扣(姑鬼寒),所以在Openrice找了另一間有七五折的餐廳訂位(這間)。入到門口就被一大堆人圍攻,一路行一路在耳邊叫真有夠吵,幸好訂位了否則真是煩死,米B則一邊行一邊喪笑。

去到餐廳空無一人有點驚,也許是時間尚早(六點半啦喎)。上Openrice看別人的食評,叫了個唔知咩雞,羊肉咖喱,芝士味同蒜味薄餅,味道還算不錯,最後叫咗杯印度奶茶,味道都幾得意。

食完就打道回府了。

黃大仙到此一遊

其實很多遊客去的地方我們都沒有去過,今日近近地去一去著名的黃大仙祠好了。因為無宗教信仰的關係,基本上平日是不會有機會接觸到,就讓米B看一看也好。黃大仙祠就在地鐵站黃大仙出口的旁邊,入口附近有很多賣風車貢品的店鋪。因為沒有了大陸遊客,店員都很清閒的樣子,但又感受不到無生意的愁悶,大概是店員都只是打工,現在反而樂得清閒吧。

也許是趁著沒遊客的時間,大部份廟內設施都在整修。那些一年被摸過千萬次的發財獅子終於可以休息一下了吧。本來想去看的月老也被圍封了,學不到那個奇怪的祭祀手法有點失落。信步走到主殿,那是每年初一搶頭注香的地方,大殿外還有不少人在求簽,上方有噴水霧的裝置令人覺得好新奇,也增加了這個地方的奇幻感。

跟米B講了為香港求簽果班人的七事(我知道那是車公啦不是黃大仙)讓她感受一下現世的荒謬。所謂入廟要拜神,入屋要叫人,我們不拜神就唯有叫米B跟神們say個hi,但我其實望不到黃大仙在哪,退而求次向坐在旁邊的關公和藥王打個招待,另外放下些少香油錢就走人。臨走還經過九龍壁,但也圍封了,想睇下都無得睇。不用半小時就行完,比預計的時間短了很多。

第二個目的地當然是在地美食了。由黃大仙祠經過一個好長嘅商場,中間扭隻蛋,再行到雙鳳街一帶。本來打算去食串燒,但調查不足兼計劃不周的關係,去到才發現人家六時才營業啊,只好退而求次去食友記車仔麵。

跟著新假期推介真係次次中伏,叫了文中介紹的魷魚和螺肉(重要加錢攪到成$49好貴),幸好加咗臨時決定的尖椒,結果只有尖椒最好食。米爸叫了正常車仔麵會食的豬紅豬皮和雞翼,份量多又唔駛加錢又好味,雞翼我沒吃但米爸話不過不失。咖喱汁方面係夠辣但我覺得太油同唔夠香,最正就係兩支大可樂,辣到hihi果陣飲真係爽到升天。米B對車仔麵餸沒有興趣,只是吃了麵和可樂。食完就繼續行去鑽石山地鐵站,結束今日的行程。

大佛遊

呢篇其實應該係六月嘅,而家寫番做個記錄。

做咗咁多年香港人,話比人知未坐過三碌拎會唔會比人笑?之前因為三碌拎勁多大陸客當然避之則吉,疫情之下無哂遊客,重唔揾機會去下應該呢世都未必會去。於是約埋奶奶表哥揾個週末一齊坐三碌拎上去睇大佛。

坐地鐵到東涌出站,食個靚早餐先拖拖然出發。纜車站完全係無人狀態,當場買完飛就可以行去坐,爽。上到纜車見到個透明車底都幾得意,我地就喺度E哇鬼叫,米B則一副興趣缺缺的樣子。

坐咗一陣就上到去個市集,當然係無咩人嘅。行咗個圈就直上樓梯去大佛度。今日其實好好天(其實係曬到裂),二百級樓梯都上到去都還好,也有少許風。因為食肉獸唔食齋嘅關係,上去兜個圈就落番嚟。老實講真係無咩好睇,叫做嚟過咁解,所以話香港D遊客景點真係相當之沉悶,都唔知D遊客嚟做咩嘅。

落樓梯後去食豆腐花補充下流失嘅水份,滑滑地咁啦但好好食又未至於。跟住行埋去第二邊個心經簡林。中途見到好多紅色嘅彼岸花,睇落好靚但影出嚟好核突。去到心經簡林其實係一個兩步就行完嘅圈,D木係幾靚嘅,個天色都唔錯,不過真係好熱。睇完就坐巴士落番東涌飲茶,又解鎖咗一個成就,不過呢D景點真係去一次就夠。

後記:米爸因為太曬佢又懶勁結果中暑返屋企嘔,比我恥笑到而家,應該會笑佢一世架啦。

2020石峽尾/深水埗遊記

因為每個週末都係攤喺沙化打機直至天黑實在太頽廢,我決定每個星期揾個地方去行下影下相,呢個週末揀咗深水埗(順便去買貓糧)。

先去一去位於石峽尾嘅地標南山邨留影。途中經過聽講會重建嘅大坑西邨,真係一個好舊嘅屋邨嘅,但舊有舊嘅味道,只要我唔係住果度。

大坑西村對面就係南山邨,上到去竟然無人,今日條走廊重好整潔,真係影相嘅好時機。喺個彩虹梯玩咗一陣就有個攝影人走上嚟,順理成章請佢幫手影咗張全家福。

影完之後就行去JCCAC。途中經過白田商場,我記得果度有檔好好味嘅魚肉燒賣(係林記小食),梗係要幫襯下。

記得米B細個喺JCCAC影過唔少相,家陣再去都無咩變,係人少咗D,幾冷清下咁。我地上咗最高諗住逐層行番落去,但行咗兩層發現腳軟,唔記得著波鞋呀今日,都係撤退啦好攰呀。

行到深水埗,先去維記整個潤牛面可樂補充腳力同體力,再去公和買支豆漿,坤記買白糖糕,再行下街邊D檔睇下電話殼,再去買貓糧就坐巴士番屋企,最後塞車塞咗兩個鐘,真係好完美嘅一日 XDDD。

I hate you

Pillow talk

“I hate Chinese. “

“You hate nearly everything, I know that."

“Yes, I hate school, I hate humans, I hate this world."

“So, do you hate me for bringing you to this world?"

“Ar……well……I don’t know……"

係咪每個天A姐都係咁憤世嫉俗架呢?

YouTube Learner

當她說同學的英文說得像鬼食泥的時候 (佢個exact wording 係 muttering,鬼食泥呢D廣東話佢識鬼),我不禁想起當初任由她看YouTube竟然收到意想不到的效果。不過她的中文爛到飛起,字也寫得醜,其實也沒有甚麼好沾沾自喜的。所以說,腦容量有限,看你的選擇如何。