cantong

近況

Published on 19/03/2022 由cantong撰寫發表留言

有網友喺Fb提起，我先記得呢度。

米家已經走佬去加拿大，米b已經讀緊公校Grade 9。呢邊讀書同香港真係好唔同，好輕鬆，郁啲就放假，返9點放3點，功課可以唔交，上堂可以用電話，重free過我返工。

生活上其實同以前差唔多，返屋企睇電視煮頽飯、得閒食快餐，日子都係咁過。

上星期我地一家疑似中招，米b同米爸咳咗一個星期，我就訓咗幾日就無事，希望大家都身體健康。

呢度生活係比香港簡單同順心，至少唔駛對住香港正苦果班舔共核突牛鬼蛇神，心理狀態都好啲。喺香港捱緊嘅大家，要頂住呀。

無聊日常

Published on 08/10/2021 由cantong撰寫發表留言

米B：係呀，今日學校度高。
我：哦，點呀。
米Ｂ：度到150。
我：吓？咪。。。
米Ｂ：（尷尬笑）係呀同上年一樣。
我：（爆笑）我諗你成世都係150架啦~~~哈哈哈哈哈
然後她追打我。

米Ｂ：媽咪借個airpod用。
我：好。
用咗都好一陣我忽然醒起。
我：呀你真係好彩今日先嚟借。
米Ｂ：Why
我：我尋日啱啱先發現個airpod積咗勁多耳屎，啱啱先清乾淨咋！哈哈哈哈哈
米Ｂ即刻除個airpod出嚟睇，無嘢啦，都話整乾淨咗啦~
我發覺我都好小學雞 XD

中二成績表

Published on 19/07/202119/07/2021 由cantong撰寫發表留言

今年因為疫情，大半年都無番過學，所以我對佢成績都無咩期望。尋日派成績表，竟然比預期好，起碼中文合格，英文同數學都算唔錯，全部都比上學期有進步，功課都交多咗，老師話佢上堂留心添，真係老懷安慰。

選科方面，佢揀果幾科（Chem Bio ICT Psy Econ）都全部入到，真係幾開心。不過我其實一向都唔擔心佢成績，最擔心反而係佢身體發展，成日無運動攤喺度唔郁，究竟對健康會唔會有影響？

Benchmark for Independence

Published on 24/06/202124/06/2021 由cantong撰寫2 則迴響

Today Riceb have date with her friends after the exam to do some rock-climbing activities. This is the first time she went alone without our company. This is her Independence Day.

Today is also the last day of Apple Daily.

同理心

Published on 13/05/2021 由cantong撰寫2 則迴響

食壽司的時候，米B跟我分享學校關於同理心的主題。她說：其實同理之後又如何？做了壞事就是無論你有甚麼苦衷，其實結果都是做了壞事，是不是？

我：對呀。

米Ｂ：我們就要原諒這個人嗎？

我：當然不是。同理心只是讓你理解壞人為甚麼會做壞事，不代表他沒有錯。

米Ｂ：對嘛，所以學校在說同理之後要原諒，我真的反眼反到到上太空。

我：I totally agreed with you。不過學校這樣說也許有原因，因為原諒了才能move on。恨憎別人要花很多能量。但原諒與否其實很視乎每個人的接受能力。有些人可以有些人不行，重點是個人選擇而不是盲目地原諒。勉強去原諒一些賤人反而會導致自己的心理不平衡，可能有反效果。

米Ｂ：哦。

所以說，有時學校所教的並非絕對的真理，不過很高興米Ｂ會有自己的意見，更會提出來討論，當然我所講的也不是真理，但會質疑才是獨立思考的第一步。

中二選科

Published on 12/05/202113/05/2021 由cantong撰寫2 則迴響

估唔到話咁快就到咗要選科嘅時候，記得我果陣係中三乜科都要讀，中四就選文科或理科。而家就唔係咁玩法，中三就要揀幾個科讀，好處係唔駛浪費時間讀啲自己唔想讀嘅嘢，壞處係，大佬，佢地想讀乜其實都無咩概念，結果咪就係亂咁揀。

學校都有介紹下選科對將來揀大學學科嘅影響，唔會好似我咁on99揀咗文科然後就後悔。至於米Ｂ想揀咩科我當然無咩意見，最多係講下咩科容易讀，例如最容易梗係Econ XD。因為討厭歷史同中文差，對文學又零興趣，所以佢都係以理科為主；結果佢好實際咁揀咗Chem同Bio（考慮大學選科），另外就係IT（受佢老豆影響）同Psychology／Econ（好明顯係我嘅影響），真係大個女完全唔駛我地擔心。

雖然學校受到疫情影響大部份時間用zoom上堂，不過暫時睇唔到對學術上有咩影響（係中文科連木籣辭都無時間教，不過算啦），社交就如佢阿媽一樣咁差，我都無話可說，佢老豆就成日blame我話我影響佢，真係六月飛霜，明明佢自己咪一樣自閉無朋友。話時話，中一同中二嘅學習生涯就比呢個疫情破壞咗，希望下個學年會正常番啦，唉。

中二家長日

Published on 03/03/202114/04/2021 由cantong撰寫3 則迴響

上星期六家長日，疫情關係都係用zoom，其實我覺得ＯＫ的。成績方面都係中遊啦，英文算好（聽講某科全班得佢一個僅僅合格）但中文很差，視藝也差因為不交功課。老師話佢可以擅用其英文優勢，幫下英文較差的同學。我話老師呀其實佢連同學都見唔到咁點幫呢？其實用zoom上堂真係好大挑戰，跟本好難集中精神，老師都話成績普遍全線下滑，都無咩辦法，都係重覆果三幅屁啦，留心上堂啦，交功課啦，之類。重有文言文真係連我都要投降，次次都係Google先識咋，不過我都同佢講盡力啦，修辭手法我覺得唔重要，但閱讀理解真係要識，唔好做Facebook上面閱讀理解０分果班盲毛。

另外視藝我質問佢做咩唔交功課，佢話好麻煩，特別係art critics。唉又係啲我唔識嘅嘢，算數啦唯有。基本上學術上嘅嘢佢都唔駛我擔心啦，真係老懷安慰，日後公開試大學之類點點點，就留番日後再煩啦。