今晚我教米Ｂ下廚整麻婆豆腐做晚餐。其實下年都係唔鬼駛參加乜煮食班，全部都揾笨嘅，跟我學重好啦！
成個過程米B就負責切同煮，我就調味同控制爐火，並監察住佢Ｄ手勢。見佢切野暫時都係麻麻地，但已經好過之前一Ｄ。
食材：
百福豆腐一盒
免治豬肉若干
蒜一粒
李錦記豆辨醬
糖／生粉／酒／胡椒粉／豉油適量
做法：
1. 蒜切粒，豆腐切丁
2. 豬肉加糖／生粉／酒／胡椒粉／豉油適量（亂加）略醃
3. 熱鑊，加少量油，爆蒜，轉色後加入豬肉炒散至熟
4. 水半碗加生粉蠔油豆辨醬一匙攪勻做獻
5. 獻汁加入豬肉，煮滾
6. 加入豆腐略攪，按個人喜好加水／糖調味，滾後可以熄火
攪掂！都幾好食。米Ｂ重有幫手洗碗添，真係老懷大慰。佢話下次整粟米肉粒飯同蛋撻，前者根本唔駛點整，後者連我都未整過，到時睇下成唔成功啦。
由於本人是無飯主婦，外食率（即出街食飯）達到百分之九十以上，因此「食乜野」可說是米家每天都要面對的最大難題，再加上還有一名（偏）食家，乜鬼都唔啱食，因此選擇就更加少了。
然後我諗咗一個方法去解決：既然大家口味唔同，不如分開食啦！好在香港食肆夠多又集中，我地揾到一間喺商場一樓的日式咖喱飯，叫咗佢至愛嘅咖喱豬扒飯後就閃人，跟米爸落樓下嘅越南餐廳去食海南雞飯同喇沙（不過呢碟喇沙中咗伏好很難食）。
估唔到佢人仔細細竟然可以食哂成碟咖喱飯 ，等佢食完我就上去埋單，再帶番佢落越南餐廳一齊坐，再大個Ｄ應該可以自己埋單落黎添。
咁樣食飯法應該只此一家啦卦。
返學行過壽司鋪。。。
米B：我最近個食譜呢。。。係咁嘅：第一位係最鍾意食嘅壽司，第二就係吉野家牛肉飯。。。
我：哦～（好野終於唔駛再食咖喱飯）
米Ｂ：呀～唔係，攪錯咗，全部錯哂呀！
我：錯咗Ｄ咩呀？
米Ｂ：應該係咁，第一位係媽咪煮嘅飯～第二位先係壽司，第三係牛肉飯。。。
我：乜得你而家講野咁假嘅？（言若有憾而心實喜之）
米Ｂ：咩呀我講真架！
我：咁我整飯盒果日你又食剩哂嘅？下？你個假人！（搖膊頭）
米Ｂ就一路笑一路彈走咗。。。
作為一個無飯主婦及社交焦慮症人士，我真係好憎香港啲街市。
地下濕、亂糟糟、條路窄、賣嘢的個個都好似目露兇光脾氣暴燥，偶爾大喝一聲「埋嚟睇！十二呅斤！」有時真係比佢地嚇到心都離埋。有時街市又會特別多人（例如天氣凍打邊爐旺季），比錢就好似要去搶咁，我試過企響個菜檔度幾分鐘都比唔到錢，就係唔夠Ｄ師奶阿嬸搶。
因為個人偏見（戴頭盔先），我極少買大陸菜。但幾乎十檔有十檔都係無寫邊度生產的，想當然是大陸吧。我成日都響個街市入邊行來行去，就係買唔到。然後就會經過一檔好似就執笠的鋪仔，Ｄ菜呀瓜呀奀挑鬼命放哂響Ｄ籃度，係呀，咪就係有機菜檔囉。請問呢Ｄ點賣？八十呅一斤。頂你我點Ｑ知即係幾錢呀？整個價錢牌其實有幾難呀？再問清楚，哦，即係四十呅一舊番薯下話。我未發達呀，唔駛啦唔該。
結果我還是要幫襯買Ｄ來歷不明的蔬果。怪不得咁多人去百佳買餸啦，起碼人地明碼實價，重寫清楚產地來源添呀。不過呢，凡事都有代價。我尋晚放工想買幾個日本洋葱（係呀，日本洋蔥，＄１４呅有三個細細地，好甜架），行到去收銀，條人龍應該有四十人。頂！
總知響香港買餸就一肚氣，唉。
見冰隔重有半包免治豬肉，就想挑戰一下整台式肉燥飯。整肉燥飯，梗係參考來自台灣的食譜，實食無黐牙啦卦？（謎之聲：妖你都唔係跟食譜Ｄ份量架啦有鬼用咩！）
首先拿個紅葱頭切碎。呢樣野真係第一次用，我以為係紅色嘅蒜頭，實際上應該似紅色的迷你洋葱。
切埋Ｄ冬菇就可以開鑊。炒好紅葱頭，再倒Ｄ免治豬肉落去炒炒炒，再倒埋Ｄ冬菇。炒緊嘅時候走去攪個調味。將所有醬油呀胡椒粉呀五香粉呀水呀米酒呀咁倒哂落個碗度。咦要落冰糖喎？我得Ｄ好鬼大粒的冰糖，是旦啦一陣會融架啦，又求其落幾粒咁。
整咗一碗調味水之後，一邊炒一邊又望下個食譜。頂！原來醬油同冰糖係用黎炒肉燥的！炒到上色入味先落其他野！唉是但啦，結果成碗調味水倒落去照炒，味道應該差唔多卦。。。
今日攪到過哂時間，唔煮咁耐啦，收工！個樣幾靚，不過味道好似甜咗D（落咁多粒冰糖做乜姐你），重有Ｄ辣（太多胡椒粉啦），希望米Ｂ肯食啦~ XDDD
很久未出現的廚神系列。
近來天氣寒冷，朝早起身最好唔好攪咁多野。剛好某天行街市時無端白事買咗隻咸蛋，於是就想起整這個咸蛋肉餅蒸飯。
蒸肉餅的食譜在網上五花百門，結果採用了這個香菇咸蛋馬蹄蒸肉餅的食譜，與別不同的地方是它用上了冬菇和咸蛋白，應該會比一般較好味吧。馬蹄就算了，反正米Ｂ又不吃。 
把肉餅和調味打好，加個咸蛋黃，再放到飯煲內就可以去睡。早上醒來，肉餅連飯已經ready了。肉餅有點乾，大概在打肉餅時要加多點水。
把肉餅倒入飯，加一點煲仔飯豉油撈勻，五分鐘攪掂，快靚正好味道喔。
煮來煮去果幾味，真係米Ｂ唔悶我都悶。趁著星期五就決定挑戰一下這個去親丼丼屋都成日食的親子丼（即係雞肉蛋飯）。
今次參考的食譜是親子丼 – 日式滑蛋雞肉飯（附食譜）。早前在AEON超市已經入了必要的調味材料（味醂和鰹魚粉），昨晚醃好雞，切好洋葱就開鑊。
先炒雞肉和洋葱，咁上下就倒入混和了的調味（例牌份量隨意），再煮至洋葱變淋。接著加蛋就完成，好似好簡單咁，事實上當然不止這樣。當我再倒入蛋液時，才發現好似太多水，Ｄ蛋唔係好凝固，啷下啷下咁……
為咗令Ｄ蛋凝固，我打斜個鑊，等Ｄ蛋集中Ｄ，再加大個火……過了一會，汁底Ｄ蛋終於凝固了，吁～把凝固部份的蛋和雞畢起放入飯壼，完成。多餘的汁就用在我的飯盒吧……
而家食緊個飯，味道都ＯＫ啦，係甜咗小小 XP
其實今日有 #鹽味肉醬飯 的後篇（因為要用埋D牛肉)，今次試下個芡汁剩係落蠔油、豉油同生粉，結果……都係咸 ಠ_ಠ 不過送飯幾好味……
昨晚有人自動請纓入廚煎牛扒，以為不會出甚麼亂子就由得他，結果因為「睇唔到Ｄ鹽跌出嚟」而喪落，做出咸到苦的牛扒，成功挑戰並奪取地獄廚神No.1的寶座。
為了重奪本人的寶座，今早就成功做出了這個＃鹽味肉醬飯，看看能不能挽回頽勢。。。
以上都是廢話，實情其實是遇人不淑才對。
話說想食免牛飯好耐，於是在網上隨便找了個食譜照做，見係Annie姐的「今晚食乜餸」，大概不會太差吧。例牌改了小小：換走蕃茄，茄汁和青豆，改落粟米，紅蘿蔔和意粉醬，減少了牛肉的份量（咁叫改小小？）就開始煮。
一直都無問題，直至落了芡汁之後埋尾試味。。。哇頂乜咁咸嘅老友？！拿拿聲加水，又加多匙糖，再試。。。都係咸，不過叫好番小小入到口。到呢一刻大家都估到，Time’s up, pan down! 法定時間又到了，唯有是旦啦，希望米Ｂ飲多Ｄ水。。。
事後檢討，大概是因為減了茄汁的甜，和蕃茄的水，又用了超咸的岩鹽，導致超咸芡汁的出現。不過，其實個芡汁不用又加豉油又加鹽吧？所以我懷疑係Annie昆我，各位真正廚神點睇？
尋晚飯煲唔記得按時間掣
今朝起身先發現未煮飯，個心離一離
差D要買吉野家
好在個飯煲有Quick mode，半個鐘就煮好Ｄ飯
加包妖怪手錶咖喱就攪掂咗
ＸＤＤＤ
Life before 2015
The story of my loved ones
讓Lifestyle回歸生活，願諸君優雅地佬去。
The story of my loved ones
The story of my loved ones
The story of my loved ones
http://www.facebook.com/sandrajija
三陪與三傻
"I HEAR AND I FORGET. I SEE AND I REMEMBER. I DO AND I UNDERSTAND". ~ MARIA MONTESSORI
Are U Ready 4 Life 