今日出發去Legoland，原本打算中途開溜讓米Ｂ自己同朋友玩，但問過米Ｂ佢話：你地決定啦～我解讀的結果是：你地喺度梗係最好啦！結果都係陪佢一齊玩。剛好Legoland隔離的鐵道博物館又無開，所以就名正言順由頭玩到尾。
不知是否疫情影響，Legoland入面都頗為冷清，遊客也不多，大部份機動遊戲都唔駛點排隊。目測園內戴口罩的人不算多，我們都除罩透透氣。名古屋的Legoland都OK多野玩，重有Ｄ未玩過嘅機動遊戲，大小細路都算盡興。
玩到咁上下我同米爸離隊去附近Bookoff兼買口罩，個超市超級巨大，行得好開心。買咗幾盒口罩，其實可以買多Ｄ但又唔係幾好意思。晚餐同大隊會合，去咗食燒海鮮，食完班細路就返酒店開局。聽日離開名古屋去高山啦。
Day 1＜＜＜
疫症發生之際撞正旅行大日子，往好處想是可順道去日本採購口罩，不好之處是大部份照片都是戴著口罩，不過倒也算是一個集體回憶。
Day 1
今次不算早機，可以施施然的去機場食老麥。跟團友會合之後先去台北再轉機名古屋。
中華航空餐飲都尚算可以，但去名古屋一程遇上氣流，飛機兩下急墜，本人心贜不好嚇至呼吸困難，腦中想起Mayday（空中浩劫）的場景竟然發生在自己身上，幾乎見到人生走馬燈，幸好飛機後來稍為穩定，餘下機程不時聽到有人嘔吐，我也強忍嘔吐感雙手緊扶坐椅，還要強裝沒事以免坐在旁邊的米Ｂ受驚（但明顯失敗），幸好半小時後安全降落，有驚無險。
到達後已經九點，在便利店稍為買了些食物就回酒店休息了。房間算是乾乾淨淨，床略小，因為睡中間的關係睡得不大好，被子也太厚太焗，但廁所倒是又大又舒服。
明天出發去Legoland。
＞＞＞Day 2
快手寫完佢免爛尾。
Day 4
今天的節目也是如常的豐富。早上先在酒店Lobby享用豐富地道早點，有本人至愛的蛋餅，米Ｂ至愛窩貼，和美味蘿白糕，重點係Ｄ野食好平。
之後大家坐巴士去咗個唔記得咩樂園。天氣雖然勁熱又曬，不過班細路都玩得幾開心。
有咩玩呢？都係跳樓機過山車氣墊球碰碰車之類啦～有個地方重有機打，最正係有強勁冷氣，可惜無凳坐。
玩到無力之後就去咗誠品整玻璃杯，每人都差唔多要玩半個鐘，根據米Ｂ講都幾好玩，個製成品都好靚下。
晚餐落咗去地庫一間上海野是旦食（因為想食小籠包），但唔係特別美味，所以唔特別講了。食完行咗好遠去食薏米甜品，可惜去到想食果樣竟然賣哂，攪到連影相都無心機。今日同樣又係攰到乜咁，聽日終於返香港啦。
Day 5
朝早週圍行下，去咗間日本野食午餐，然後就坐專車出機場返屋企LU。同戰隊去旅行真係又充實又舒服，下年我地再接再厲啦~
Day 3
今朝要離開民宿出番去台北，走之前例牌影相留念。
團友卜咗專車出台北，先去九份貓村放天燈再返西門町酒店。但開車果位大媽竟然將我地綁架咗去睇爆布同九份上面個山，喂其實無野睇囉想點啊。
折騰咗粒幾鐘，終於去到九份，食咗個牛肉麵，行下街買手信食芋圓，好快就夠鐘上番車。九份比起幾年前其實都無咩改變，只係心理上覺得D野好似無以前咁好食咁。
好快又走，要趕去貓村睇貓。因為開車大媽話只能夠逗留四十五分鐘，大家唯有滾水淥腳咁跑過，一邊揾路揾貓摸貓影相真係忙到乜咁。Ｄ細路一見到有貓就好興奮。
跟住本來係要去十份放天燈，但大媽表示擔心塞車要番台北，妖咁你又叫我地喺貓村趕餐死？真係勞氣不過都無計，我反正都唔鍾意放天燈呢件事所以就算數，不過下次咪鬼幫襯佢啦！坐咗粒幾鐘車䉒台北西門町，今次間酒店好唔錯，有免費小食，間房又大，好舒適下。
休息咗一陣大家又出街行，先去玩夾公仔，但我們一家對於夾公仔都屬殘廢水平，所以得個睇字，最後QQ睇唔過眼我地太廢，結果送咗一隻比米Ｂ。然後大家唔知點解咁走咗入間玩具鋪度揀公仔，而米B就睇中咗隻角落生物。本來淘寶應該平好多嘅不過算啦去旅行就係要用高價買下廢物先開心。
之後大家去食燒肉，我地將班細路放埋一枱，由得佢地自己燒自己食，結果米Ｂ都係食咗好少，同埋跟本就係Anson燒哂，大小姐真係慣咗有人服侍。之後又去射槍夾公仔啦，我就去咗寵物店買野，攪完一輪米Ｂ同我都已經攰到乜咁，終於有得返酒店。
聽日去樂園玩，真係每日Ｄ節目都好豐富囉。
>>> Day 4-5
Day 2
今日係去農莊耕田插下秧咁，由於驚埃瘋會跌落田所以無拎出黎，相都係喺朋友Fb度偷番黎。感覺係赤腳踩落淤泥度好恐怖，滑溜溜又絕住咁又勁驚會PK，結論係我唔想做農夫 XDDD
耕田之餘重有好多野做嘅，好似坐耕田車抬擔挑扯大纜玩鴨玩貓磨米磨冰煎鴨蛋卷整豆樽仔咁，節目豐富。
午餐都唔錯但搶唔夠肉食，夾咗一次就無哂。個白肉同苦瓜都幾好味。整體黎講都多野玩，可惜我整日都因為頭痛欲裂無咩心機，近年次次去親旅行都唔舒服個人真係虧，唉。米Ｂ就天生係咁樣嘅，並唔係唔開心，大家留意番。
玩到四點幾就走人去食鴨宴，又鮑魚又鴨皮壽司，個鴨湯超正但大家都超級飽，食到Ｄ野剩哂，點解個套餐份量咁騎呢，八人餐有兩隻鴨真係奇鬼怪。
食完去夜市行咗一陣就返民宿休息，充實又飽足嘅一日（重好攰）。
＞＞＞Day3
轉眼又十一月，簡單記一記今次台灣之旅。
Day1
機場集合，由於擔心節外生枝，今次轉坐機場快線，其實都算快又方便（時為八月尾，坐的是港鐵不是黨鐵）。過關後入禁區才發現翠華已摺，焗住幫襯泰國餐廳的早餐，又貴又難食，唉。
今次坐國泰（頭盔：幾個月前買架啦），個飛機餐真係令人無言，不過個電視都夠大嘅，又有好多電影睇，竟然有閃靈真係笑咗，不過因為航程太短所以唔睇啦。
順利到達過關，出機場就有專車接送到宜蘭，車程大約個半鐘左右。中途去了整麻糬。本來舊麻糬好地地，整完之後就覺得唔係幾想食 XD
好快又去到民宿，裝修都幾有特色，大廳有波波池，每間房都有滑梯同公仔，如果3-4年前嘅米Ｂ應該會好開心，而家又只係哦一聲。
跟住坐的士出去晚飯同夜市。呢間駿懷舊餐廳Ｄ野食好好味又唔貴，裝修都幾有特色。原來"鴨賞"係宜蘭特色食品，重幾好食，可惜要雪藏帶唔到番香港。
食完去夜市行街，夾公仔做神鎗手，估唔到米Ｂ會有興趣玩又真係射到喎，最後贏咗支筆 XD
之後大隊去按摩，我地離隊先返民宿訓覺，真係好豐富嘅一日，好鬼攰。
>>>Day 2
Day4
床太細訓得麻麻地，但休息過後感覺好過尋日。朝早去粥店食鮑魚粥，明明之前食過覺得超好味，今次可能係要一人食一碗，真心好辛苦。鮑魚粥無味，蟹粥ＯＫ，最好食都係最平嘅蠔粥不過有小小腥味。我地三個人夾埋只係食到一碗多Ｄ，超級浪費食物。應該唔會再encore根本無咁大食囉。
食完粥坐長程地鐵去一個超大商場，有個場比班細路玩。因為只係米爸入咗去陪細路所以唔知咩料，我就無所事事咁行來行去，無咩想買，然後又頭痛又好攰連相都無乜點影。班細路玩完就去Shakeshake食漢堡包，都幾好味。
之後坐車去食鮑魚，味道ＯＫ啦，重有蟲食真係好得人驚，不過班細路就慘Ｄ，無野食要食辣麵，而米Ｂ竟然食咗好多，又升呢啦佢，返香港可以挑戰冬蔭功。
Day5
訓覺又覺得好咗，今日去玩RunningMan，入個場玩遊戲揾野咁，玩咗１個鐘，都幾攰但都幾好玩。之後重去咗個大便樂園但我無力影相不過都幾好玩的。
然後又係食野時間。今日下午茶係韓式炆豬手，多得團友用韓語溝通，原本無得食都變有得食。味道係幾好不過我覺得唔係好夠飽，不過咁就啱啦，夜晚去明洞附近行街食炸雞，正呀（又食）XD
行街中途發生小插曲，話說成班人入咗Line Store，QQ想問隻公仔有無discount但又驚驚地，米Ｂ就自告奮勇咁陪佢去問店員，幾個細路圍威喂咁喺counter度問野好得意～（可惜最後係無discount) 行完街就結束我地最後一晚喺韓國，聽日就返香港啦～
Day6
朝早自由活動行街買野，我地無咩想買就訓到十點。之後去食埋個人蔘雞就坐專車出機場返香港啦～多謝團友的安排！
今次旅程雖然全程爛口講野都痛、又傷風病咗幾日頭痛到裂、隻右腳又痛到好似殘疾人士去滑雪咁樣、阿女又整唔見八達通、日日食熱氣野攪到燥火到爆唇瘡……但係都巧開心因爲幾廿歲人黎學snowboard 竟然成功咗、又買到鍾意嘅袋同鞋（夾埋都係四舊水）、心目中諗住買嘅面膜膏、重有情人節禮物收（幾廿年都無收過今次真係破記錄）、而且領隊們安排妥善食買玩交通都好好， 下年我地同樣時間再見 XD
為免重蹈上次TRIP爛尾的覆轍，今次韓國TRIP就一次寫哂算。
Day0
大初二半夜出發的凌晨機，雖然機上安靜又帶齊訓覺裝備（眼罩頸枕），但可惜全程未能入睡，三個多小時的航程雖不算長，但落機時帶著疲累的身軀在機場等巴士，對四十多歲老人家來說真是非常煎秏，亦埋下了傷風感冒的伏線。
Day1
五時到達機場，等待七時半的巴士往滑雪場。車上理所當然的補眠，約十一時多到達滑雪酒店。落車不久米Ｂ問：為甚麼滑雪場無雪？嗯。。。
午飯後（個飯hea到唔想講，總之咪喺韓國食日本野啦）按原定計劃去了水上樂園，因為無帶電話入去所以無相。入邊尚算温暖，也有熱水池但浸完起身凍到乜咁。我因太倦在沙灘椅上睡著約半小時，醒來無所事事，米Ｂ就自己去玩。匿喺暖房打一陣機約四點幾大家話要走了。其實個水上樂園都唔算大，玩幾野就玩哂。沖涼梳洗後去咗間韓國餐廳食晚飯，味道不錯但米ｂ太攰米爸又唔舒服又嘔，結果浪費了不少食物。
Day2
訓咗一晚元氣恢復，朝早竟然落咗雪真係好驚喜。一早去上期待已久的Snowboard Lesson，教練是個高大的韓國哥哥，兩個小時轉眼就過叫做學識咗基本野，食完午飯就上山碌落黎，因為雪唔夠跌到好痛，隻腳又唔知做乜好痛，結果玩咗幾轉就收工。開始傷風，米Ｂ玩得唔好所以心情好差。夜晚又返去間韓國餐廳食差唔多嘅野，米爸同Anson就繼續夜滑自己攪掂。
Day3
早餐後繼續帶痛腳玩snowboard，好在今日我同米Ｂ技術都好咗，跌少咗同可以控制左右移動，下次應該可以上更加高挑戰中級雪道。玩到三點幾就還裝備再坐巴士出番市區明洞。途中因為架巴士好Ｑ焗又坐得唔舒服，耳仔塞咗覺得自己好似潛咗水咁。晚餐前掃街，有人喺街邊買龍蝦食好開心咁，米Ｂ就食燒雞。是日晚餐係懶人燒肉，味道唔錯重有人燒埋，飯來張口都幾爽不過因為唔舒服食乜都無乜味覺。唔知點解感覺市區重凍過滑雪場，食完都無力行街就返酒店休息，好在真係好近。房間雖然細但都幾企理。
（寫唔哂添，待續先）
原來我唔記得咗寫遊記呢件事 XD
第三日一朝早節目係行去二条市場食海鮮飯。條路唔算遠，十五分鐘左右，細路梗係一路玩一路行一路影相。。。結果好似都行咗半個鐘 XD
去到本來想去果間又因為太多人嘅關係入唔到去，重要比人喝我返出去等，你老闆而家日本D服務業真係差咗好多。結果就去咗對面街我地上次幫襯過果間，又咁啱佢又有位喎真係好。有時一大班人最緊要都唔係好食係有位坐囉（不過果間都ＯＫ好食嘅你睇下D海膽～）
食完就要坐地鐵去真駒內轉巴士入公園玩。由於比預定時間遲咗大半個鐘，應該趕唔切十點八果班巴士，唯有坐下一班啦。點知坐地鐵去到個站下一班車竟然要等一個半鐘，要十二點半先有車。唉都無辦法啦，好在有雪玩下啫。於是一班細路就喺路邊電箱前面玩咗好耐。玩夠就趕鴨咁趕佢地入去室內候車，點知班細路竟然喺車站候車處玩紅綠燈，好大聲好滋擾真係（汗），不過算啦都係玩咗十分鐘左右就趕走佢地去上車。
半個鐘巴士後終於去到鈴蘭公園，喺門口免不了又影一輪相。
入到去都無咩時間滑雪，大家都衝過去玩水泡玩雪兜，又適憑係星期日鬼咁多本地人，不過大家都玩得開心嘅。
因為要趕最後一班巴士所以我地三點幾就急急腳趕住走人，玩得兩個鐘倒梗係唔夠喉，唯有喺巴士站又再玩過啦。
大家就玩到癲哂咁因為有好多雪呀～
玩咗成日大家又例牌好肚餓，今日去食和牛燒肉放題。老實講和牛水準就一般啦都係Ｄ頭頭尾尾不過都夠飽嘅，大家又喪叫野飲每人四千五百YEN。
食完就行過最後一個景點時計台就番酒店休息，聽朝要早起離開札幌啦。
趁假期同朋友仔同狗仔一齊去離島行下。經驗話比我地知長洲南Y島就一定人山人海，反而坪洲就真係算少人，上船都唔駛點排隊。港孩米Ｂ本來最憎去郊遊，但聽到大頭都去就乜都ＯＫ。
落船第一件事就係揾食，根據線報去了一間有鮮蝦多士嘅茶記。雖然味道不怎麼樣，價錢也不算便宜（＄３８／＄４４／＄５２），不過當自己做遊客就無咩所謂啦。
飯後四周行，人不多很舒服。再沿路行上山，天氣極好和極熱，幸好路程都不算遠。雖然最高海拔只有95米，但上上落落都要花點力氣。
終於行到個亭，真係舒服到唔捨得走。
上山落山之後都只是三點幾四點，於是在碼頭附近的遊樂場打發時間，本來想在坪洲晚餐但全部餐廳都客滿，唯有看完日落後坐船回途了。
結果三家人去了元氣食壽司 ＸＤ
是日輕輕鬆鬆的算是一個不錯的郊遊節目，多謝大頭主人借出大頭一整天，真的辛苦了 XD。
Life before 2015
The story of my loved ones
讓Lifestyle回歸生活，願諸君優雅地佬去。
The story of my loved ones
The story of my loved ones
The story of my loved ones
http://www.facebook.com/sandrajija
三陪與三傻
"I HEAR AND I FORGET. I SEE AND I REMEMBER. I DO AND I UNDERSTAND". ~ MARIA MONTESSORI
Are U Ready 4 Life 