今年真係無嘢好講，幾乎成年都留喺屋企，連學都唔駛返，成個暑假都無游過水，簡直係停頓嘅一年。
唯一可以記下就係１月底同朋友去咗明古屋旅行，玩雪同順手買咗好多口罩，好懷念可以唔戴口罩出街嘅日子。
疫情期間偶爾都有出去四圍行下逛下街咁，都去過唔少地方。
另外就係買咗部Switch，玩咗幾個月熱情就退卻，諗起以前後生果陣瘋狂打機真係要嘆一句俱往矣。
不過其實無聊是福，世界這麼糟，我們還是如常過日子，是不是應該感恩。希望明年大家都能繼續日常生活，順順利利。
2020回顧
分類: 親子遊
2020名古屋口罩團Day2
今日出發去Legoland，原本打算中途開溜讓米Ｂ自己同朋友玩，但問過米Ｂ佢話：你地決定啦～我解讀的結果是：你地喺度梗係最好啦！結果都係陪佢一齊玩。剛好Legoland隔離的鐵道博物館又無開，所以就名正言順由頭玩到尾。
早餐ＯＫ啦
大家出發
坐幾個地鐵站就到
不知是否疫情影響，Legoland入面都頗為冷清，遊客也不多，大部份機動遊戲都唔駛點排隊。目測園內戴口罩的人不算多，我們都除罩透透氣。名古屋的Legoland都OK多野玩，重有Ｄ未玩過嘅機動遊戲，大小細路都算盡興。
玩到咁上下我同米爸離隊去附近Bookoff兼買口罩，個超市超級巨大，行得好開心。買咗幾盒口罩，其實可以買多Ｄ但又唔係幾好意思。晚餐同大隊會合，去咗食燒海鮮，食完班細路就返酒店開局。聽日離開名古屋去高山啦。
又係細路坐一枱
開局啦
Day 1＜＜＜
2020名古屋口罩團 Day 1
疫症發生之際撞正旅行大日子，往好處想是可順道去日本採購口罩，不好之處是大部份照片都是戴著口罩，不過倒也算是一個集體回憶。
Day 1
今次不算早機，可以施施然的去機場食老麥。跟團友會合之後先去台北再轉機名古屋。
候機中
上機啦
口罩黨
中華航空餐飲都尚算可以，但去名古屋一程遇上氣流，飛機兩下急墜，本人心贜不好嚇至呼吸困難，腦中想起Mayday（空中浩劫）的場景竟然發生在自己身上，幾乎見到人生走馬燈，幸好飛機後來稍為穩定，餘下機程不時聽到有人嘔吐，我也強忍嘔吐感雙手緊扶坐椅，還要強裝沒事以免坐在旁邊的米Ｂ受驚（但明顯失敗），幸好半小時後安全降落，有驚無險。
到達後已經九點，在便利店稍為買了些食物就回酒店休息了。房間算是乾乾淨淨，床略小，因為睡中間的關係睡得不大好，被子也太厚太焗，但廁所倒是又大又舒服。
Lawson炸雞幾juicy
床有點小
廁所不錯
可愛的食物
明天出發去Legoland。
＞＞＞Day 2
2019北海道 Day 6-7
終於到最後兩日，一口氣寫埋佢 XD
Day 6
今朝本來諗住去三角市場食蟹嘅，但因為唔想行咁遠決定去附近食海鮮飯先。揀呢間係因為網上好多comment都勁讚，又近我地酒店。店鋪位於遊客區中心，三個人要叫三個飯，埋單9300yen。其實我又唔覺得特別新鮮好食，D刺身咪又係喺雪櫃拎出嚟，最大賣點應該係果幾舊大蟹腳，係好食嘅。
食飽就慢慢周圍行睇玻璃，D野好靚但真係無用到一個點，所以都係齋睇多。不過都係忍唔住手買咗條鍊，米Ｂ就買咗粒150yen嘅玻璃粒，真係慳妹嚟嘅。中間入咗去北菓樓休息，買咗件餅食，都幾好味。
因為天氣凍，行兩野又要走入鋪避寒，結果行到街尾就差唔多天黑，快腳去整埋個音樂盒先。今年嘅主題係聖誕節。
個音樂盒要等半個鐘Ｄ膠水乾咗先可以拎，我地就去咗對面一間勁多遊客嘅鋪頭行，裏面原來好大又有幾層，行下影下得意野又夠鐘，可以去食個early dinner。行過一間好多人嘅綠茶雪糕店，個人好凍但又好想食雪糕咁點算呢？答案就喺間鋪入面：坐喺暖爐前面食咪得囉 XD
今日終於食到魚真，完全係六日以嚟食得最開心嘅一餐，抵食又好味，正正正！飲飽食醉後去便利店買埋個甜品就返酒店，個布丁出乎意料咁好味！
Day7
今朝其實無咩行程，因為要坐11點班JR出機場。原本打算去三角市場食蟹，但有人話已經食到刺身疲勞，所以決定行去食個魚餅就算。途中經過條鴨橋，以前我地同米Ｂ喺度餵過鴨，但而家Ｄ鴨都唔見哂啦。
食完返酒店順利check out，趕到11點班JR去機場買手信兼食lunch。今年個counter去咗無雷公咁遠，行出行入都要十分鐘，結果又係趕趕趕，米Ｂ用10分鐘極速食完個咖喱飯就仆到咁出境，唉點解成日都要趕真係唔明，明明已經預留咗好多時間架嘛。不過而家出境真係好快，全部counter都好似e道咁，好似大約用咗5分鐘就攪掂。
次次經過都覺得好睇唔好食
好遠條路
食快D呀
臨上機都要食個雪糕重攪到一手都係
都係香港航空返啦，上機後有驚喜，發現部份機位嘅娛樂系統係work嘅，雖然都係得Ｄ舊戲不過好過無啦 XD。飛機餐都算幾好味，我覺得好食過國泰囉。
札幌再見
個冷麵最好食
個炒飯都入得口
睇柯南
終於返到香港，結束7日嘅行程。一如以往啦，今次旅行都算順利，係米B成日青少年面真係好難頂，下次考慮要佢留家看貓，我同米爸兩條友去就算。
九點返到香港
今次真係買咗好少野咋
Day 1＜＜＜
2019北海道Day 5
今日係留喺二世古嘅最後一日，朝早食完早餐兼Check out就打算喺呢邊玩下就算，但一去Family Lift就後悔，又係旺角咁款重多人過前日，唉。
上到去滑咗一陣米爸就話不如滑過隔離個山，但米Ｂ又唔係好想去，於是又沿路落番去，玩兩野又夠鐘食飯，是旦去咗入口隔離間酒店餐廳食，估唔到又幾好味，不過lunch時間就係人山人海。食完飯又坐纜車上咗山頂，勁大風又凍，行行企企攪咗好耐先發現根本無路比初學者落山，結果我同米Ｂ唯有坐番纜車落山。落到山都三點，又差唔多夠鐘要走，好似浪費咗大半日咁，下次真係要認真Ｄ研究下路線先得，完全係浪費時間同金錢。
山頂負八度左右
斜到咁點落
天婦羅飯幾好食
還裝備前影下相先，呢間鋪租野真係唔錯嘅，抵佢咁好生意，下次希望有機會可以繼續幫襯。鋪入面基本上係用英文溝通嘅，你講日文佢地應該都好頭痕下 XD。
goodbye snowboard
兩個都係藍色板真係好襯
Snowboard要上樓
門口係cashier
還完野就係時候走人，等巴士去俱知安站再轉車去小樽，不過勁多人等車，架巴士又迫到乜咁差Ｄ上唔到車，好心開多幾個班次啦老友！巴士站前有幾架美食車，有人又忍唔住買咗個漢堡包。
企咗大約２０分鐘就到俱知安站，再轉一個半鐘JR到小樽。小樽同札幌一樣都係無咩雪，今次卜咗間新酒店（但個名好難記，運河前附近啦下），內籠設計好靚，特別欣賞佢個酒筒櫃。
Hea完諗住出去魚真食飯，發現原來已經八點半，魚真九點關門。在沒有選擇之下唯有去番上次果間揾笨實魚萬，重要勁唔好彩坐喺三個煙鏟隔離，唉。最好食係個帶子剌身，非常新鮮彈牙，其他食物只是一般而已。
食完就番酒店休息，因為成身都係臭煙味走咗落去大浴場到浸，可惜唔係温泉不過好過無。明日又係無咩行程，可以唔駛咁早起身。
2019北海道Day 4
過夜後精神稍為恢復，捉米Ｂ落去食早餐，當然唔夠之前果間咁好味，但都算可以食飽嘅，面包都幾好味。
因為買咗全山券，所以今日決定坐巴士去第二個滑雪場試下，聽講隔離個Hanazono好適合初學者，於是就坐免費Shuttle Bus過去，好幸運喺最後一刻上到車。坐咗大約20分鐘就到咗一個好廣闊嘅滑雪場，Ｄ粉雪勁厚。不過個初學者電梯似乎無咩人用，我地同米Ｂ一齊行過去就明白原因：因為實在太短又太平，滑落黎完全無意思，行過去又浪費氣力。結果米Ｂ就坐喺平地上面玩雪，米爸就單拖上山睇下咩環境先。
米爸落嚟之後就話唔多適合初學者上去，結果我地又要轉場去Annupuri果邊。坐咗差唔多一粒鐘巴士先過到去。不過果邊好玩好多，又平又闊的雪道很適合初學者，落纜車由當初的傻瓜三人組（次次都三碌拎）終於變番正常初學者，只有我偶爾會碌地，但也未至於當初那個狼狽模樣了。
纜車冒死拎電話出黎影相
今日終於記得食午餐
山上嘅時間真係過得特別快，好似上咗去兩次又天黑，又要坐成粒鐘巴士返去Hirafu果邊。下次如果再黎應該住Annupuri或者Niseko Village呢邊。
夜晚Book咗間餐廳食和牛，雖然唔平但都幾好味，叫做補番尋日個聖誕大餐。
食完米爸去Night Ski，我同米Ｂ就返酒店，浸下大浴場，睇下電視咁。聽日最後一日滑雪啦。
2019北海道Day 1
今次北海道之旅以驚嚇嘅方式開始。
由於是八點機所以要五點起身，但係三點先訓，結果只係訓咗兩個多小時。五時十五分，米b都順利起床了，昨日執了一天多的行李有兩大箱，希望沒漏帶重要東西。出機場book了黃的，服務幾好之餘重有野送，第一次坐的士坐得咁舒服開心。
去到機場check in後如常老麥食早餐。施施然食完先發覺早已過了登機時間二十分鐘，距離起飛只有半小時！頓時倒抽一口涼氣然後拔足狂奔，過境花了10分鐘，入到去見水牌已顯示final call！那個登機口偏偏又無雷公咁遠，重要去到最督果個位。我狂奔至一半路程已氣力不繼，而米b則越戰越勇，一馬當先衝到前面，我離遠看到地勤人員都還在就鬆了一口氣，趕到登機櫃位後發現我們並不是最遲的，還有3個在我們後面 XD，一定係早機嘅關係，大家都矇下矇下嘅。
今次我哋坐香港航空，之前都有擔心佢會執笠去唔到，仲特登買定旅遊保險，好在最後又冇事。不過飛機上面嘅娛樂系統就冇咗，所以我哋都預先帶咗iPad同書上去睇，米B竟然帶埋功課上去做，真係港孩唔易做。
等起飛
飛機餐有點難食
竟然喺飛機上面做功課
例景一張
捱左四個鐘頭，終於都到札幌。見肚餓去便利店買咗兩串雞咬下，又幾juicy但係衰在凍咗。跟住例牌逛下初音館，買下folder然後坐JR入札幌。家陣有電子Suica卡真係好方便，用電話Do下就入閘唔駛去買飛，可惜無兒童版。
串雞都幾好味
只影唔買係策略
2019年嘅初音都幾靚
出到札幌已經天黑，雖然係零下幾度，但真係唔算好凍，不過周圍都無咩雪。由於米b期待食湯咖哩已久，特登上網揾咗間札幌頭三位嘅湯咖哩諗住試下，點知推住行李好辛苦咁搵到間鋪先發現佢冇開，勁失望，結果唯有去返我哋去過好多次嗰間，不過都係好食嘅。
食完就坐地鐵返酒店，今次揀咗中島公園附近嘅JAL City酒店，價錢合理而且又大又新淨，唔錯唔錯，不過唔記得問下Ｄ咖啡究竟要唔要錢，無飲到真係浪費咗。
間房幾有空間感
外觀都唔錯
唔知收唔收錢嘅咖啡
放低行李之後就坐地鐵過返去大通公園睇聖誕市集。因為只係23號，個市集都唔算好多遊人，賣Ｄ無咩用但好靚嘅聖誕裝飾，算係感受下日本嘅聖誕氣氛。
行完又肚餓可以去食燒肉啦～今次去咗食和牛出名嘅味覺園，叫咗個和牛拼盤，係幾好食嘅，不過同我地以前食嘅和牛好似有啲分別，無咗果種入口即融嘅感動，牛舌就幾好味。食完我哋就行路返酒店休息。因為尋晚訓得太少，個人攰到乜咁所以都係早Ｄ訓。
＞＞＞Day 2
2019北海道Day 3
朝早起身順利check out，然後過隔離酒店上巴士去滑雪場。呢架Whiteliner巴士真係好方便，事前要網上預約兼比錢，到時就有工作人員去集合地點揾你，真係好安心又放心。坐咗大約兩個鐘頭就到啦。沿途見到積雪好厚，又落大雪，同札幌係兩個世界，果然二世古真係名不虛傳。
便利店早餐
中途站
真係兩個世界
今次住Hirafu，我都係第一次去。酒店喺大斜路中間，都算係滑雪場附近嘅。去到酒店放低行李就換衫去租滑雪用品。根據網上推薦去咗對面街嘅Rhythm。入到去果然覺得D員工好friendly，好快就同米b租好snowboard同鞋，全部係滑雪名牌Burton嘅（米Ｂ塊板係Soloman嘅），然後覺得自己忽然間勁咗，充滿信心咁向住附近嘅Ace Family Lift出發。
去到Family lift真係嚇一跳，人山人海又窄好似旺角銀行中心出口咁樣。米爸先拎野返酒店，我同米b就完全唔記得要做咩，頭先Ｄ氣勢一下子無哂，唯有揾個位坐喺度等米爸返黎再講。等咗幾個世紀米爸先黎到，見到咁嘅狀態都唔係辦法，就決定坐纜車上咗去先講。
上去其實都唔係問題，最大挑戰係日本規定Snowboard要上咗一隻腳先可以坐纜車，唔似韓國可以攬住塊板上咗山先慢慢著。換言之我地要用單腳扇落纜車，結果不負眾望三條友一齊三碌拎跌倒地上。不過無事嘅，跌低咪起番身囉。上到去碌落山其實算係容易嘅，不過第二次上去同樣一齊PK，米Ｂ重要手踠著地受傷，幸好應該只是扭到並沒有骨折，她也很堅強的繼續滑。其實我唔明點解要喺初級雪道落車位整幅牆喺度比人撞呢？Anyway，山上嘅時間過得特別快，轉眼到四點，日場夠鐘收車，我們三人都體力不支宣佈放棄Night Ski。
因為晚餐訂咗八點半，所以放低裝備後決定先去食Pizza同意粉當下午茶，味道OK啦但個意粉唔夠熱。食食下先醒起點解三條友咁攰應該係因為我地唔記得食lunch早餐又食得少囉。
Pizza幾好味
意粉唔夠熱
食完天黑番酒店，因為又凍又攰決定連晚餐都唔去食，Cancel咗booking後就過對面便利店買咗兩個杯麵同一公升蔬果汁，呢個就係我地嘅聖誕大餐啦，BTW個醬油拉麵幾好味，米B都食咗唔少。
斜路上的滑雪場
聖誕杯麵餐
2019北海道Day 2
札幌嘅第二日，今日本來打算去鈴蘭公園玩，但因為唔夠雪，公園有好多玩雪嘅設施都冇開，於是決定放棄唔去，周圍行吓就算（下面係中島公園，Ｄ雪薄到1cm都唔知有無）。
酒店嘅自助早餐真係幾好，竟然有刺身同埋Kagome蔬果汁任飲，勁開心。講開又講，喺咁乾燥嘅天氣之下，蔬果汁及維他命Ｃ真係好緊要，我勁飲咗兩大杯好滿足。另外個南瓜湯都ＯＫ嘅，茶泡飯則屬個人喜好。
食完早餐就出發shopping。今日米爸要買滑雪衫、snowboard 同對鞋，因為實在太多野要買，竟然揀咗幾個鐘頭，買完真係天都黑埋，米b就喺間鋪入面睇電話，因為等得太耐所以嬲到唔出聲。
結果米爸滿載而歸，而我地為咗謝罪就同米Ｂ再去食多餐湯咖喱。多得Google又比我喺地鐵站附近揾到間好似都出名嘅湯咖喱。順利揾到路上去，食落又真係幾好味，重好多本地人幫襯添。米Ｂ話好食過之前果間。
食完個早晚餐米B都已經嬲完，我哋就喺狸小路行咗一陣，去Animate行下，又去大戶屋食咗朝思暮想嘅綠茶甜品同豆腐沙律，跟住就好滿足咁返酒店休息。聽朝一早就要起身搭巴士去二世古滑雪LU。
扭下蛋先
竟然中咗最想要果個！
Animate朝聖
大戶屋好味
隨手影的街景
2019台灣之旅 – Day4-5
快手寫完佢免爛尾。
Day 4
今天的節目也是如常的豐富。早上先在酒店Lobby享用豐富地道早點，有本人至愛的蛋餅，米Ｂ至愛窩貼，和美味蘿白糕，重點係Ｄ野食好平。
豐富早餐
Lobby開餐
之後大家坐巴士去咗個唔記得咩樂園。天氣雖然勁熱又曬，不過班細路都玩得幾開心。
入場前例牌大合照
買飛先
誓師大會？
有咩玩呢？都係跳樓機過山車氣墊球碰碰車之類啦～有個地方重有機打，最正係有強勁冷氣，可惜無凳坐。
玩到無力之後就去咗誠品整玻璃杯，每人都差唔多要玩半個鐘，根據米Ｂ講都幾好玩，個製成品都好靚下。
就係呢間玻璃屋
排排坐等燒玻璃
好得意的工作服
晚餐落咗去地庫一間上海野是旦食（因為想食小籠包），但唔係特別美味，所以唔特別講了。食完行咗好遠去食薏米甜品，可惜去到想食果樣竟然賣哂，攪到連影相都無心機。今日同樣又係攰到乜咁，聽日終於返香港啦。
Day 5
朝早週圍行下，去咗間日本野食午餐，然後就坐專車出機場返屋企LU。同戰隊去旅行真係又充實又舒服，下年我地再接再厲啦~
Are U Ready 4 Life 